دفا بردان
********
بنكسر كل يوم حاجه
ونخسر كل يوم حاجه
ولما حاجه تجمعنا
تفرقنا 200 حاجه
انا وانتي
دفا بردان
وفرح بيبكي
م الاحزان
قزاز مسكور
ف ضلة سور
شبع شاكي من الحرمان
انا وانتي
رضا طمعان
سراب مرسوم
علي الجدران
كلام ساكت
وضوء باهت
عيون صابها
عمي الالوان
بندي لبعض كل الكل
وندور ..منلاقيش حاجه
..!!
بنكسر كل يوم حاجه
ونخسر كل يوم حاجه
ولما حاجه تجمعنا
تفرقنا 200 حاجه
انا مجنون عشان صابر
علي نارك
ومصلوب علي جدارك
ليل بيحن لنهارك
مشافشي غير سواد بيئن..!!
انا مفتون لكن قادر
علي زيفك
مشاعري كرهوا تكتيفك
وشيخاني مع خريفك
لروح لا بترضي ولا بتحن
...!!
جوعي اكل لحمي
وعراني
وصمتك قتل حلمي
وعنواني
انا ماشي ف طريق
واقف
وتحت الشمس
مش شايف
لكن هرحل
ومش خايف
تحية
لموجك الراجف
تحية
لظلمك العاطف
تحية
لجرحك النازف
سلام ووداع
سريع خاطف
ما عدتش باقي
علي حاجه
بنكسر كل يوم حاجه
ونخسر كل يوم حاجه
ولما حاجه تجمعنا
تفرقنا 200 حاجه
************
هشام ابراهيم