صرخة الجعانين
*******
طلعتوا عين ابونا
ف عيشتنا كرهتونا
وخنقتونا
وقرفتونا
ومن حياتنا زهقتونا
لازقين ف نعال جزمكم
مش محطوطين ف بالكم
شربنا من كلامكم
واكلنا من كلامكم
ونمنا من كلامكم
الرحمه من كلامكم
بسكوتكم نقطونا
طلعتو (....)ابونا
يا اهل البدل والكرافتات
يا اهل الفلل والعربيات
يا مظفلطين
ومحفلطين
وع الكراسي متبتين
(لحظة من فضلكو
بصو ع البني ادميين)
لقمه وبناكلها حاف
ابدان م الجوع نحاف
بنام من غير لحاف
وبنصرخ يا معييييييييين
وانتو ودن طين
والتانيه من عجين
الله يلعن ابوكو
لو كنتو مش سامعين
ده اصغر ما فينا شاب
والعيشه بقت هباب
والمستقبل سرااااااب
والحال اصبح مهين
وانتو ودن طين
والتانيه من عجين
الله يخرب بيتكوا
لو كنتو مش حاسين
بيوتنا حطانها قش
وعشانا دود ومش
وكلامكم كله غش
والداهيه مصدقين..!!
بتقولو الجي ورد
بكلام مسترش عرض
عايشينها طول بعرض
واحنا اللي منسيين
صابرين والصبر مل
واهو خلتوها خل
لو مش هتلاقوا حل
الثوره للجعاااااانين
,واللي عشناه ف ذل
هندوّقوا للكل
لما الميزان يختل
مفيش يامه ارحمين...!!
جمل المحامل نخ
وشبعنا اه واخّ
نصبتوا الف فخ
ووقعنا فيه سنين
بس المرادي لأ
ولأ والف لأ
لينا ف رقابيكو حق
وهناخدو م التخين
هناخدوااا م التخين
************
شعر / هشام ابراهيم